موتي يا مصر
إيهاب لُطَيِّف - 2007
مصر بنت سمره
صغيرة
في سوق العبيد
باعوها أهلها
واقفة تحت نار الشمس
ترعش وحدها
فاكك النخاس ضفاير شعرها
والندا : مفيش حد يخدم في بيوتكم زيها
العيون إيدين نجسة
بتنهش لحمها
تعريها
وتكشف كل شبر في جسمها
خَدَّها
رافض يكون مجرى الدموع
مش حانكسر
ولو حاموت م الجوع
اللسان ساكت
بس العذاب مسموع
***
البنت خدمت سنين في قصر الملك
وإتبهدلت عمر في حفر القناة
أتكلست إيديها وكتافها من شيل الحجر
لما إستعبدوها : الهرم واللي بناه
جرجورها تحارب
في صحاري البدو
وفي بحر الجريج
حروب غيرها
لكنها أول قتيل لما العراك بيهيج
***
ولمّا الزمن هَد حيلها
وهشش عضمها
الكل رماها
وفاتها لوحدها
قاعده في ركنها
تلحس جرحها
اللي إغتصبها
بيرجع كل يوم
ويعيد فعلته
و ولادها
من جهلهم
- وللا من جبنهم -
سايبنها تنـزف وحدها
***
البنت السمره ما عادتش صغيرة
السنين
راسمه الألم على وشها
والسكات راسم العار على وشّنا
يا مصر موتي بقى
داحنا متنا من زمن
وشك الصابر كاسفنا
وكاشف عجزنا